Gaur egun berezia da, aspaldi idazteko nuen zerbait idazten hasi naiz. Social Blogworks izenburupean blogak, sare banatuak, web semantikoa eta orokorrean informazioa eta jendartearen sare arkitektuari buruz aspaldi nituen gogoeta batzuk plazaratzen hasi nahi dut. Ez dakit nora eramango duen ibilbideak, baina zuekin egin nahi dut bidea. Hainbat atal pentsatuta ditut jada, esku artean duzuen hau lehenengoa. Atala jaitsi eta dituzuen komentarioak, iritziak, ekarpenak jaso nahiko nituzke… iruzkinak, trackback/pingbackak, twitter, posta irekiak dauzkat jasotzeko. Amaieran honek formarik hartuko balu parte hartu duzuen guztien izenak edo nick-ak ere jarriko ditut. Noizbait hipertestu honek panfleto (liburu?) forma hartuko balu bere lizentzia librea izango litzateke, orain den bezala. Bagoaz…

Asko idatzi da blogen inguruan eta batzuek komunikatzeko tresna honen heriotza ere iragarri dute. Blogak edizio pertsonalerako sareko tresna bat dira, ideiak, iritziak, informazioak, multimedia edukiak Interneten zehar komunikatzeko edizio tresna sinple bat, EKS Eduki Kudeaketa Sistema sinple bat alegia. Blogak jaio aurretik baziren beste asko, blogek erraztasuna ekarri zuten, besterik ez eta orain blog horiek ere eraldatu dira, gauza gehiago edo gutxiago dituzte, baina edizio pertsonalerako tresnak izaten jarraitzen dute. Jaitsi 1. atal osoa [ODT] [PDF]

Gehiengo sindikalak eta eragile gehiagok deituta maiatzaren 21ean greba orokorra deitu dute. Deialdi horri jarraituta egun horretan greba egingo dut. Ez nire enpresan dudan egoeragatik, bertan arazoren bat badut, nire nagusiarekin (nagusi baino gehiago lankide denarekin) eztabaidatuko dut. Horretarako ez dut arazorik.

Egun horretan egoerak horrela eskatzen duelako aterako naiz kalera eta ez era pasibo batean, Grebaorokorra.info webgunearen bidez informatzera aterako naiz kalera. Egun horretan jendeak bidalitako bideoak, argazkiak, loturak … ikustea espero dut, bakoitzak ahal duena, ahal duen tokitik. Zuk ere zerbait egin dezakezu, behintzat Internet bidez.

Grebara ateratzeko arrazoiak bakoitzak bereak izango ditu, nireak hauek dira:

• Aldaketa politiko sakonak eta aberastasunaren banaketa egokiagoa behar dela uste dut.
• Langile sektoreek pairatzen duten eskubide urraketa gero eta larriagoa delako.
• Jendarteko sektore asko (gazteak, emakumeak, migratzaileak…) egoera honek era gogorrean harrapatzen dituelako eta hauei elkartasuna adierazteko.
• Kolektibo bezala patronalak, urte askotan izandako irabaziak beraientzako metatu ondoren, orain galerak denon artean ordaintzea nahi duelako.

Aipatu ditudan arrazoiak oso orokorrak dira, baina badira gertuagoko arrazoiak ere:

• Nire herrian langile eta familia asko sufritzen ikustea tokatu zait, Went-Thermik, Cortusa…
• Nire senideek lan egiten duten fabrikaren inguruneetan ere gauza arraroak gertatzen hasi dira.
• Ezagun askoren familietan krisiaren eragina pairatzen ari dira.
• Nire herrian eta, orokorrean, nire inguru guztian ikusten ditudan erabaki politiko eta sozialak gustatzen ez zaizkidalako.

Krisi hau pairatzen ari diren guzti horiei elkartasuna adierazteaz gain, langile mugimenduak eta herri mugimenduak ilusioa berreskuratu behar dutela iruditzen zait. Ilusioa berreskuratzeko lehenengo pauso moduan ulertzen dut nik greba orokorra. Internetek bere garrantzia erakutsiko duen greba orokorra. Bestalde, greba orokorra politikoa dela eta ezertarako balioko ez duela diotenei Bertol Brechten hitz hauek gogoratuko nizkieke. Noski greba politikoa dela, gehien eragiten gaituzten erabakiak ez al dira politikoak? Zer da greba apolitiko bat? Apolitiko edo analfabeto politikoa zer den ondo adierazi zuen Bertolek.

Analfabeto okerrena analfabeto politikoa da.

Ez du entzuten, ez du hitz egiten, ez du parte hartzen gertaera politikoetan.

Ez daki zein kostu duen bizitzak, ez daki ogiaren prezioa, irinarena, soinekoarena, oinetakoena edota erremedioena; erabaki politikoen menpe dago.

Analfabeto politikoa astakirtena da: harrotu egiten da eta politika gorroto duela esaten du.

Bere ezjakintasun politikoak sortzen du prostituta, abandonatutako haurra, eta baita lapurrik okerrena ere: politikari ustela, txoriburua eta enpresa nazionalen eta multinazionalen ipurgarbitzailea.

Bertolt Brecht

Egun horretan GOerreportari asko egongo gara informazioa jasotzen eta hedatzen, herritarretatik herritarrentzat. Eta zu?

Aspaldiko kontu bat da mikroformatuaen gaia blog honetan. Batzuek badakite zenbat txapa eman dudan mikroformatu eta RDFa bezalako teknologiekin. Arazoak izaten nituen jendeari teknologia hauen interesa erakusteko, baina gauzak egiteko era hobeago bat zela sinetsi behar zuten ia ia. Operator toolbar bezalako tresnek etorkizuna erakusten ziguten, baina hala ere zaila zen bistaratzea. Web semantikoa minuskulaz deitu genion honen inguruan hitzaldi, tresna eta ikastaro batzuk eman ditugu.

Orain Googlek mikroformatu eta RDFa erabiltzen duten kritika edo iritziak jaso eta bere bilaketetan informazio hori ematen hasiko dela iragarri du. Hau da, Internet zeharkatzen joango da Googleren errobotak eta informazio semantiko hau duten rich snippets hauek dituzten atalak era berezian tratatuko ditu. Datu guzti horiek jaso ondoren metatu eta denon baturaz informazio sozial gehiago emateko gai izango da.

Googlek etorkizuna ezagutzeko aukera gehien duen enpresa da eta

argi dago etorkizuna hemendik ikusten duela. Era hauetako teknologiak erabiltzen badira, Ez da bakarrik Google izango, edozeinek informazio zati horiek jaso eta bere aplikazio propioak, agregatzaileak, bilatzaileak egin ahal izango ditu. Horrek Googleren “monopolioa” lurperatzeko balio dezake, baina Googlek orain arteko Interneteko handiak bezala bere nagusitasuna, bide geldiezin horretan ere erreferente bilakatzeko baliatuko du. Google handia da, baina ez tontoa. Bide honek Interneteko datu eta informazio banatuago bati bidea irekitzen dio, horregatik teknologia semantiko hauek erabiltzea gomendatzen dizuet, ez Googlek erabiltzen hasi delako baizik eta etorkizunerako ere interesgarriak direlako.

Eguneraketa: Iñaki Alegria irakasleak helbide interesgarri bat bidali dit Google Becomes Best Evangelist for Semantic Web