“Baliabide handiegirik eduki gabe, baina konpromiso handiarekin hedabide nagusiek eman ez zuten informazioa eskaini duen proiektu parte-hartzaile bat”. Horrela argudiatu zuten Argia-ko lagunek saria eta erabat ados nago esandakoarekin. Saria jasotzera igo ziren Fakun, Galder eta Nagore eta Fakunek saria “langabezian eta ERE-en atzaparretan eroritako guztiei eskaini zien bereziki”.
AN nolakoa den ezagutzen dugu. Baina, gainera Angela Murillo bezalako epaileak ere aguantatu behar dira. ANko Belen Esteban honek jendearen bizitza epaitzeak ere delitu izan beharko luke. Batez ere, tutik ere ulertzen ez duela aitortzen badu.
Bi artikulu ditut oraindik igo gabe blogera zuen komentarioak jaso ahal izateko: The Big Crunch eta Tresnek ez dute komunitatea eraikitzen. Ea laster igotzen ditudan.
Bihar Argia sarietan egongo naiz gonbidatu-infiltratu bezala. Gertatzen diren gauza batzuk ZutaGu eta Twitter bidez jarraitu ahal izango dituzue. Ahal badut zuzeneko bideoren bat ere botako dut, baina hori bihar ikusiko da. Hori bai BacalHauko badok13 txapa batzuk eramango ditut nahi ditutenarentzat.
Norbaitek iPad-ari buruzko gogoeta sakona espero bazuen jai dauka. Hurrengo astean Uni Encounter izango da Eibarren eta jada VI. aldia da. Hemen duzue programa osoa PDFan. Asteartean Dani eta biok Androidi buruz hitz egingo dugu. Ea Androidzale gehiago biltzen diren eta norbaitek hitza hartu nahi balu, lekua izango luke, animatu!
Gaur arte, Bostetako diligentzian parte hartu dut Info7 irratian. Agin Rezolak gidatutako programan oso gustora egon naiz. Orain beste lan batzuengatik utzi behar izan badu ere, berari dedikatu nahi diot mezu hau. Harrigarria bada ere, ez gara elkar fisikoki ezagutzen, baina kontrolatuta daukat bertsolaritza txapelketan egin zituen bideoei esker. Hemendik aurrera Anfora programan kolaboratzen egongo naiz, Xabi Aipurua kazetariarekin.
BacalHau irla eratzen hasi da. Bere sorrera gutunean hau adierazten zen.
BacalHauen zaudela jakiteko beharrezkoa da dakizun hori, sortzen duzun hori besteekin banatzea. Besteekin banatzean bakarrik, komunitatean egiten duzun ekarpenagatik eta besteengandik jasotako erantzunengatik jakingo duzu BacalHau irla batean zaudela. Lasai, berehala jakingo duzu.
Ba sortzen hasi da eta aurreko egun batean bere lehen pausoak eman zituen. Irlan egon ginenok badok13 txanpon berria soinean eraman genuen. BacalHaura iristeko ez da beharrezkoa bere sinboloak erakusten, baina nolabait egun horretan fisiko egin zen gure irla mitikoa. Txanpon (txapa) gehiago ditugu, nahi duenak edo eskatzen dituenarentzat, noski BacalHautar sentituz gero bakarrik eskatu.
Horrekin batera, urtero egin beharreko lehenengo mitoa ere sortu zela ere esan genezake. Urtean behin BacalHautar bakoitzak, beste 3 BacalHautar izan daitezkenei sinboloa duen zerbait oparitu beharko die. Berdin du zer txapa bat, paper bat, kamixeta bat… Nire opariak bidean dira, baina egindako txapa hauek denontzat. Eskatu eta ikusten garen hurrengoan bat emango dizuet.
badok13 moneta
#
Zutagu sare sozial berria sortu du Elurnetek. Hau da, lan egiten dudan enpresak . Zutagu ezagutza partekatzeko sare sozial bat da. Bere helburua, besteekin ezagutza partekatu nahi duten pertsonak bildu eta beraien artean elkartzea da. Goi mailako ikasketak dituzten pertsonak, gai batean lanean diharduten profesionalak edo aisi moduan gai baten inguruan interesa duten pertsonei baliabideak eskaini nahi dizkio sare sozial berri honek. Bertan erabiltzaileek hainbat tresna izango dituzte blog sinple bat, ftxategi biltegi bat, laster-markak gordetzeko tokia, wiki antzeko orrialdeak, mikromezuak jartzeko haria… Baina horretaz gain, interes taldeak osatzeko aukera ere izango dute eta taldeek ere zenbait tresna propio izango dituzte:
bloga, fitxategi biltegia, foroa, wiki orriak…
Sare soziala sortzeko Elgg software libreko plataforman hartu dugu oinarri eta hau bera euskarara lokalizatu eta denon eskura jarri nahi izan dugu. Horrela nahi duenak bere sare sozial propioa sortu ahal izango du euskaraz Elgg tresna erabiliz.
Horretaz gain, nabarmenu nahi dugu tresna erabiltzeko ez dela zertan kontu berri bat sortu behar, Google, Twitter, Yahoo eta Open ID konturen bat dutenek automatikoki sartzeko aukera izango baitu.
Proiektua ilusio osoz hasten dugu, ea erabilpen politak eta interesgarriak egiten dituzuen.
Web 2.0aren eztandarekin informazioa sortzeko eta jasotzeko aukerak handitu egin ziren. Hainbat lekutan blogak, wikiak, etab. sortzeko aukera egon zen. Horren informazioaren planoan informazio gehiago sortzeko eta bakoitzak bere iturriak aukeratzeko aukera sortu zuen. Jada hedabide zentralizatuak ez ziren informazioa helarazi zezaketen bakarrak. Baina, era berean azpiegitura aldetik, sare banatu bat izan zitekeena zentralizatzen joan dira. Software librea eta hardwarearen kostu txikiak direla eta zure blog, webgune, wiki, posta… sortzea inoiz baino errazagoa den arren.
Azken hilabeteotan enpresa handiek eta Googlek batez ere zentzu honetan pauso berriak eman dituzte. Gure datuak nahi dituzte eta ematen ari gatzaizkio. Gmail ezagunarekin hasi ziren, Google Analytics-ek informazio izugarria eman zien eta orain Google Public DNS eta Google URL Shortener sortu dituzte. Edozein trafikoren bitartekari izan nahi dute, informazio hori ere eskuratu ahal izateko. Konturatu zarete benetako URLak ez diren gero eta helbide gehiago daudela URL helbide laburtzaileak, Facebook-eko URLak,… Ondo azaltzen du Chris Messinak bere The death of the URL mezuan.
Jordi Salviaren Haitiren inguruko artikulu interesgarria. Berak ere Naomi Kleinen The shock doctrine-erekin antzekotasun nabarmenak ikusten ditu Haitin. El Paisek Kubaren ekarpenak ezkutatzen dituen bitartean.
Droneak, gidaririk gabeko espioitza hegazkinak dira. Oso ezagunak dira Irak, Afganistan eta baita Palestinan ere. To shoot an elephant bideoan ere aipatzen dira. Parrot enpresak (kotxerako esku-libreko sistemak egiten dituen berak) iPhone baten bidez gidatu eta kontrolatu daitekeen drone bat sortu du. AR Dronea gainera programagarria izango da eta errealitate hedatuko jokoak garatzeko balioko du. Interesgarria da ikustea erabilpen militarrerako ikerkuntza, gero eta azkarrago igarotzen dela kontsumo merkatuetara (eta posible bada aurretik jada norbait DIY eran garatu duela). Baina, zer gertatuko litzateke kontrolatzen gaituztenak kontrolatzeko erabiliko bagenitu?
Amerikako herri pobreenean arazo bakarra lurrikara izan dela esan digute orain. Horretarako herriaren militarizazioa eta kontrola beharrezkoa dela argudiatzen dute AEBk. Laguntza humanitarioaren aitzakia erabiliz herrialdea okupatzen eta kontrolatzen hasi dira, XXI. mendeko Tonton Macout berriak. Hain da argia zein Estatu Frantsesak ere kontuak eskatu dizkiola AEBei. Aurretik beraien herrian bertan probatu zuten teknika bikaina, hondamendiei esker posizioak hartzeko. Honela beste hainbat herrialdeek eta batez ere ALBAko herrialdeen bidea oztopatu nahi dute. Baina, kontrako ahotsak ere agertzen hasi dira.
Haiti kanpoan bitartean bankuak, jendeak laguntzeko egindako ekarpenekin aberasten jarraitzen du, izandako protestei era egokian erantzun gabe.
Blogera bueltatzen. Informazio asko jaso eta bidaltzen dugu, baina askotan informazio hori informazio prozesatugabea da. Nik behintzat informazioa, loturak hartu eta nire testuingurura egokitzeko beharra izaten dut. Bestela hor gelditzen dira irakurtzekoen zerrendan edota lotura interesgarrien artean. Era berean Twitterren botatzen ditudan mezuak eta sortzen diren elkarrizketak ez dira oso mamitsuak izaten, ez aukera ematen ez dutelako baizik eta medioak ez duelako ematen. 140 karakterek muga handia ezartzen dute horretarako adibidez. Hemendik aurrera beraz jasotako informazioa, hausnartua eta pixkat landua ere blog honetan joango da. Apunte moduan, beharbada aurrerago post luze batean amaitzen dutenak. Twitter informazio prozesatugabea eta momentuko egoera mezuak botatzeko bakarrik erabiliko dut. Postit hauek ohar garrantzitsuak izango dira, egun batean esnatu eta koaderno batean apuntatzeko beharra sentitzen dituzun horietakoak. Beraz hadi!
# #
http://tinyurl.com/yjp4ser #
# # http://tinyurl.com/yjp4ser #
Orain arte ezagutu dugun sarea gero eta kontrolatuagoa egongo da. Botereen aldetik, saioak gero eta gehiago dira. Berriki ezagutu dugu Ekonomia Iraunkorraren Legeak deskarga ilegalak ahalbidetzen dituzten webguneen aurka proposatutako neurriak. Sorpresa nahiko handia izan da neurri horiek hartzea erabakiko duen auzitegia Espainiako Audientzia Nazionala izatea.
Espainiako Gobernuak neurri hain gogorra hartzeko erabakia hartzearen arrazoi guztiak ez dakizkigu, baina erabaki hori bultzatu duten lobby-en indarraren isla bat da. Estatuan auzitegi horren politizazioaz, erabaki sumarioez eta neutraltasun ezaz hitz egiten hasi dira. Antolatzen ere hasi dira, eta Red Sostenible ekimena sortu dute. Euskaldunen artean ezaguna da Egunkaria epaitzen ari den auzitegiaren izaera.
Estatu hauek interes pribatuekiko duten morrontza herritarren gainetik jartzen dute, baina hainbat botere daude leihan; batzuetan estatuak dira, baina beste batzuetan botere ekonomiko pribatuak. Bigarren horiek estatua beren mesedetan erabiltzea lortzen ez dutenean, talkak sortzen dira. Googlek, adibidez, bere zerbitzariei egindako eraso baten ostean, Txinatik ateratzeko mehatxua egin du. Txinako Gobernuak ezarrita zizkion zentsura neurriak eta Interneteko askatasuna jarri du aitzakia moduan, baina hori baino gehiago botere borroka bat dago honen atzean. Egia da Googlek orain arte Interneteko eskubideen aldeko apustua egin duela, baina bere interesak ere defendatzen ditu. Txinan, adibidez, Gobernuak ezarritako neurriek bertako merkatuaren kontrola baldintzatzea lortu zuen. Google, gainera, gure informazio askoren jabe da, eta, ondorioz, kontrol handia izan dezake gugan. Eta esparru pribatuan herritarren kontrol neurriak askoz ere gutxiago dira.
Botere ekonomiko pribatuak gero eta esparru gehiago menderatzen ari da. Estatuak, askotan, botere ekonomiko horrek bahituta dauzkan egiturak izaten dira, baina barruan ere lehia dago. Lehian dagoen hori herritarren askatasuna da, eta hori ez digute ez batak ez besteak ziurtatuko. Internet aske eta neutral bat eskatzen jarraitu beharko dugu; lege horiek salatzea ere ondo dago, baina inoiz baino aukera gehiago ditugu antolatzeko, baita ekonomia era berriak probatzeko ere. Ekin beharko diogu.
Berria.info webgunean | PDF bertsioa | Inprimatzeko bertsioa
Berriako Irlen Sarea atalean argitaratutako artikulua
Internetek gero eta tontoago egiten gaitu. Hori da batzuek esaten dutena. Baieztapen hori zentzugabekeri bat bada ere, kezka garrantzitsu bat gordetzen du. Internet, gure pentsatzeko era aldatzen ari ote da?
Iraganean oso garrantzitsua izan da beti memoria lantzea. Idaztea zenbait apaiz eta prailek zuten pribilegioa zenean, hauek idatzitakoa, baina gehien bat, herriaren memoria kolektiboan gordetakoak lortu du gaur egungo gizarteei forma ematea. Memorian kantitate handiak gordetzea oso preziatua izan da. Ars Memoriae izenaz ere ezagutzen dira, hori lortu ahal izateko teknika ezberdinak. Baina, gaur egun memorian datuak gordetzearen garrantzia txikiagoa du. Nolabait memoria hori gorde eta nahi dugunean eskuratzeko bideak hobesten ditugu. Gainera, askotan Interneten bilaketa sinple bat egitearekin gure dudak uxatzen ditugu.
Memoria baino, baliabideen arteko erlazio egokiak aurkitzean dago gakoa. Informazio iturri egokiak elkar lotu, pertsona egokiekin harremanetan jarri, datuen arteko erlazio egokiak ezarri. Hori da gaur egunean memoriaren ordezko “arte berria”.
Honek bere gauza on eta txarrak ditu. Alde batetik informazioa kudeatzeko filtroak ezarri behar ditugu, baina filtro horiek bakoitzak erabaki beharko ditu. Orain arte filtroak ere baziren, baina bakoitzak bereak ezartzeko aukerak ez ziren hain handiak. Hedabideen aurrean adibidez, bakoitzak bere filtroa jar zezakeen, baina azkenean informazio iturriak gutxi ziren. Orain aldiz informazio iturri asko ditugu. Informazio uholde horretan filtro egokiak aukeratzea oso garrantzitsua da, baina oso zaila aldi berean.
Aldaketa honen beste sintoma bat, gure arreta gauza bakar batean jartzeko arazoa da. Gero eta jende gehiago da, besterik gabe liburu bat osorik edota webgune bateko artikulu luze bat, salto egin gabe irakurtzeko zailtasunak dituena. Blogetan izaten diren eztabaida eta testu mamitsuen ordez, sare sozialetako eztabaida labur eta askotan interesik gabekoez ordezkatzen ari da jende asko.
Hausnartzeko gaitasuna ere eraldatzen ari da pertsona batzuetan. Nahiago dugu adibidez zerbitzu berri bat probatu, honek eskatzen dizkigun baldintzak ezagutu gabe, orain arte %10ean ezagutzen ditugun zerbitzuetan gehiago sakontzea baino. Memoria eta hausnartzeko gaitasunik gabeko gizarte bat erraz manipulatu daiteke.
Berriako Irlen Sarea atalean argitaratutako artikulua
Urte amaiera iritsi da, iraganari buruz hausnartu eta etorkizunari begiratzen hasteko unea. Egunotan erromatarren mitologiako Jano jainkoa etortzen zait burura. Jainko horrek bi buru ditu, bakoitza alde batera begira. Hasiera eta bukaera adierazten ditu. Horregatik, urteko lehenengo hilabetea adierazteko erabilia izan da; hortik dator Ianuarius eta ingelesezko January, adibidez.
Internet eta teknologiaren munduan urte oparoa izan da. Bederatzi@2009 sariek euskal sarean izandako berrikuntzak nahiko ondo laburbiltzen dituzte. Gai edo gailu berrien inguruan komunitate berriak sortu dira, hedabide eta formatu berriak agertzen hasi dira, hainbat salaketak ere oihartzuna izan dute sarean, egile eskubideen inguruko eztabaida piztu eta sakontzen hasi da…
Gure komunitatetik kanpo, Google izan da albiste berriro ere. Bere jarduerak aldaketa sakonak eragin ditu gizartean. Mugikorren munduan ere aldaketa handia ekarri du, sortu duen Android sistema eragile berriarekin.
Sare sozialen urtea ere izan da; Facebook eta Twitter nagusitu dira. Horiek ere eragin handia izan dute gugan. Horiekin batera, pribatutasunari buruzko eta tresna horiek erabiltzeko moduen gaineko kezkak ere sortu dira. Liburu elektronikoa, egile eskubideak, datu publikoen eskuragarritasuna, lizentzia libreak… gai eztabaidatuak izan dira. Eztabaida garrantzitsuak dira, eta etorkizunari begira ondo erantzun beharreko erronkak.
2010ari begira jarrita, oso urte garrantzitsua dator. Krisi ekonomikoarekin zer gertatuko den ikusi beharko dugu, baina interesgarria izan daiteke. Denbora errealean informazioa jaso eta bidaltzeak garrantzi berezia izango du; web soziala deitutakoak garrantzia izaten jarraituko du; Internetera gero eta leku gehiagotatik eta gailu mugikorretatik sartzera ohitzen joango gara, eta erabiltzen ditugun zerbitzu asko beste askoren nahasketaz osatuta egongo dira eta ez dira gure ordenagailuetan exekutatuko, urruneko makinetan baizik.
Jano jainkoa gauzak aldatu nahi dituztenen jainkoa ere bada. Urtean zehar haren tenplua itxita egoten zen, baina guda garaian irekita. 2010. urtea izan dadila tenpluko ateak ixteko urtea, indar berriekin etorkizuneko ateak irekitzeko.
Berria.info webgunean | PDF bertsioa | Inprimatzeko bertsioa
Berriako Irlen Sarea atalean argitaratutako artikulua
