Hasieratik Internet adierazpen askatasuna gauzatzeko biderik askeena izan da. Orain arte horrela izan bada ere, gero eta eraso gehiago dago askatasun horren aurka. Azkena, AEBetan blogetery.com sareko 73.000 blogen itxiera. Arrazoi argirik ez dago, baina badirudi gobernuko segurtasun agentzia batek itxi duela, terrorismoarekin erlazionaturiko mugimenduak direla eta.

Badirudi arrazoi gutxi behar direla ez blog bakarra, baizik eta milaka saretik kanporatzeko. Baina, gurean ere horrelakoak gertatu izan dira. Espainiako Estatuaren historiala nahiko handia da. Batasuna.org webgunea saretik kanpo utzi zutenetik, gero eta gehiago izan dira, azkena Gaztesarea.net.

Facebook Interneteko sare sozial ezagunak ere, 4.600 jarraitzaile zituen Arnaldo Otegiren orrialdea itxi du bitan. Berriro ere arrazoiak garbi utzi gabe. Hala ere, jada beste orrialde bat sortu dute, eta Arnaldotegi.com ere abian da.

Hori dena gutxi balitz, AEBetako Gobernuak neurri gogorragoak proposatzeko bideak ireki ditzake. AEBetako presidenteari emergentzia egoeran Internet osoa edo parte bat itzaltzeko aukera emango liokeena.

Beraz, gero eta garrantzitsuagoak dira adierazpen eta informazio askatasuna ziurtatuko duten Wikileaks.org bezlako ekimenak martxan jartzea. Iraken AEBetako armadak zibilak hiltzen grabatutako bideo bat zabaldu zuenean egin zen ezagun ekimen hori. Ekimen horrek beste hainbat gauza ere lortu ditu: ACTA izenez ezaguna den egile eskubideen inguruko eta eskubide urraketa garbiak barne hartzen dituen akordioaren agiria zabaltzea.

Ekimen hori baino zabalagoa eta garrantzitsuagoa izan da Islandiako Gobernuaren Icelandic Modern Media Initiative IMMI izenekoa. Horren bidez, Islandia ikerketa kazetaritzaren paradisua izango da. Informazioa askatasun guztiarekin zabaltzeko aukerak eman nahi ditu, gardentasuna eta anonimotasuna ziurtatuz.

Egoera ikusita, gure sare propioak eraikitzen hasi beharko dugu, Guifi.net proiektuak egiten duen moduan. Baina bitartean bakoitzak ahal duen neurrian bere bloga, bere komunitate txikia edo Interneteko sare sozial gertuagokoak eraikitzen joatea garrantzitsua izango da. Hitzez aurre egitea garrantzitsua da, baina ekintzak behar dira.

Berriako Irlen Sarea atalean argitaratutako artikulua

EHUk antolatutako udako ikastaroak hasi dira. Horien artean, Euskara 2.0 jardunaldia antolatu dira, eta parte hartzeko aukera izan dut. Bertan entzun eta hitz egindakoaz ez dut laburpenik egingo, baina gehien interesatutako gaiak azpimarratu nahiko nituzke.

Euskararen zabalkundea lortzeko kanpoan zein barruan erreferentzialtasuna bilatu behar dela azpimarratu da. Batez ere ikusgarritasuna lortu ahal izateko. Horretarako, sareetan ondo konektaturik egon behar dugula ere atera daiteke ondorio gisa. Konexio horien bidez, beste sareetako jendeak ezagutuko gaitu, gure informazioa hauetara zabaldu ahal izango dugulako.

Hori guztia lortzeko, baliabide egokiak beharko ditugu. Askotan baliabideak ez dira oztopoa software librearen kasuan, adibidez, baina bai jendearen parte-hartze maila. Hizkuntzarekiko militantzia hori, sarean ere eta batez ere euskararen erabilpena, gakoak izaten jarraitzen dutela argi dago. Militantzia forma berriak, aktibismoarekin lotura gehiago badu ere.

Arloei begiratuz gero, hezkuntza mundua arlo garrantzitsuena bezala ageri da. Bertan eduki propioak sortzeko beharra, eta horiek era parte-hartzaile batean eta agenteak kontuan hartuz egitearen beharra argia da. Teorian baino gehiago praktikan jartzeko urgentzia nabaria da. Gauza txikietatik hasita bada ere, ondoren hauek eragin handia izan baitezakete.

Hedabideen alorrean, informazioa zabaltzeko aukera gehiago emango dituzten hedabide parte-hartzaileagoak eta jendartearekin harreman zuzenagoa dutenak bultzatu beharko genituzke. Horrekin batera, kulturan euskarazko eduki gehiago sortu, eta eduki hori besteentzako erabilgarri jartzea ere beharrezkoa dela argi gelditu da. Arlo horretan, jendeak sortutako edukiari, zein eduki profesionalari, biei, tarte egin behar zaio.

Softwarearen inguruan euskarazko itzulpen memoria biltegi publiko baten beharra nabarmendu da, software librearen aldeko apustu egitearekin batera.

Helburu zehatz batzuekin sortutako komunitate euskaldunak sortzen jarraitu behar dugu. Aldi berean, sareko tresna berri guztien bidez gure mezua zabalduz eta kanpoko eraginak jasoz. Euskara era malguago batean erabiliz eta ideia hauek guztiak komunikatuko dituzten mito/ideia berriak zirkulazioan jarriz.

Berriako Irlen Sarea atalean argitaratutako artikulua

Zerbait aldatu bada azken urteetan bidaiatzeko era izan da. Gure gurasoek beren herria eta ingurua bakarrik ezagutzen zuten; gaur egun, aldiz, jende askok munduan zehar ibiltzeko aukera dauka. Arraroa izaten da hegazkin bat hartu ez duen norbait aurkitzea.

Aldaketa horiek guztiak teknologiaren bitartekaritzaren ondorioz gertatu dira. Horien artean, Internetek erraztasun handiak eman dizkigu lekuak ezagutu eta horietara joateko bidaiak lortzeko. Interneteko berrikuntza askok sozializatzeko denbora bat ematen dute, eta bidaiak izan dira sozializazio maila garrantzitsu bat lortzen lehenengotarikoak. Bidaiak bilatzeko Minube.com, Atrapalo.com eta gisako atariak eta low cost bidaiak izan dira fenomeno horren garapenaren arrazoi nagusiak. Argi dago, beraz, bidaiatzeak interes handia duela. Google handiak ere aste honetan ITA erosi du. ITA enpresa hegaldi eta eserleku libreei buruzko informazioa kudeatzen duen enpresa garrantzitsu bat da. Oraingoz, Googlek adierazi duenez, informazio hori bakarrik bere bilatzailean integratzeko erabiliko du.

Baina, horretaz guztiaz gain, bidaien inguruan beste hainbat fenomeno interesgarri ere sortu dira. Bidaiarientzako komunitateak, informazio webgune ugari, sare sozialak… Horien artean etxea trukatu nahi dutenen komunitateak: Homeexchange.com, Intervac-homeexchange.com, Livingaway.com… Horietaz gain, etxeetan txoko bat, sofa bat behintzat uzten duten pertsonen sareak ere sortu dira. Hotel, pentsio edo lo egiteko leku batean dirua gastatu nahi ez dutenentzat Couchsurfing.org eta gisako webguneak daude.

Baina fenomeno harrigarrienen artean nomadismo berria dago. Denbora guztian bidaiatzen ari diren pertsonak dira horiek. Batzuk zergak ez ordaintzen saiatzen dira, beste batzuk pribatutasuna bilatzen dute, beste batzuk estatuen zirrikitu legalak baliatzea… Aholkularitza enpresak (Ptshamrock.com) eta informazio webguneak (Neo-nomad.net) sortu dira. Wired aldizkariak gai horri artikulu oso bat eskaini zion. Horietako askok teknologia etengabe erabiltzen dute, komunikazioa mantentzeko eta beraien bizimoduak horrela eskatuta. Denok pentsatu dugu noizbait betirako desagertzea, hau era horietako bat izan liteke.

Berriako Irlen Sarea atalean argitaratutako artikulua