Teketen

Atzo #acampadadonostia -an egon nintzen. Aurretik orokorrean mugimendu horri buruz Irlen Sarean idatzi nuen, baina bertan egon eta parte-hartu behar nuen gertu sortutako mugimenduaren berri erreala izateko. Hemen, hor ikusi, sentitu eta gertatutakoak:

1. Zorionak! Horrela hasi nahiko nuke nire mezua. Swarming erara antolatu eta asanbladetan antolatzeko gaitasuna izan duzuen pertsona horiei. Batez ere nukleo gogorrari, bertan lo egiteko prest gelditu denari. Badakit sentitu izan dudalako beste batzuetan ere, hor bildu diren pertsonak ez direla berriro ere berdinak izango, zerbait aldatu dela beraiengan eta hori jada oso garrantzitsua da. Carlo Frabettik GARAko “La revolución ha comenzado” artikulu interesgarrian Marxen hitz hauek gogorarazi dizkit:

La importancia de las movilizaciones sociales estriba, más que en sus logros inmediatos, en su capacidad de transformar a quienes participan en ellas.

2. Jende gaztea eta gloria zaharrak ikusi ditut, alderdi ezkertiarretakoak, V de vivienda mugimenduan ibilitakoak, abertzaleak, anarkistak, komunistak eta “apolitikoak” (bere burua horrela identifikatu nahi dutenak alegia). Denak maila pertsonalean, nahiz eta bakoitzak bere filia eta fobiak izan. Beren burua apolitikotzat duten horiek esan dezaketenari garrantzi gutxi ematen diot nik, ez baitakite egiten ari diren hori bera politika ere badela.

3. Euskara is missing! Eztabaida honetan zentratu nahi izan gabe ere eta nahiz eta asanbladak lehen egunetik elebiduna izan behar zuela adierazi, badirudi bereziki asanbladetako nukleo gogorreko batzuen ondorioz batez ere, hau ez da betetzen ari. Horietako batzuek gainera, ahotsa nahi duten moduan erabili dezakete, mikrofono bakar bat egon beharrean (denentzat), pertsona batek mikrofono propio bat ere bazuen!

4. Sormena lantzeko talde txikietan antolatzea garrantzitsua da eta hori bai gertatu izan dela. Hala ere, hor ere aktak hartzeko eta aurreko eztabaidak ez errepikatzeko (edo kontzienteki errepikatzeko) antolakuntza ez dago landua. Eztabaidak nahastu eta erabat inoperatibo egiten dute mugimendua.

5. Testuinguru soziopolitikoan txertatu gabeko mugimendu bat da. Batzuek ezberdina dela adierazteko joera dute eta ados nago, baina orain arteko borrokak kontutan hartu behar dira eta batasuna bilatu. Batzuek ez alderdi, baizik eta jendarte honetan oso errotuta dauden eskari batzuen aurrean kontrako jarrera erakusten dute. Era berean, mugimendu ezberdin bat dela azpimarratu, baina Madrileko copy&paste bat egiteko prest daude, hemengo erreferentziak alde batera utziz. Akats oso larri bat da, demokrazia errealaren eskaria (eta beste eskari sozialak ere) kontutan hartu behar ditu mugimenduak eta egiten ez badu bere arrakasta kolokan egongo da. Adibidez. Euskara erabiltzeko beharraren aurrean, gai hori politikoa zela adierazten zuenik ere bazegoen.

6. Definizio ezaren alde ilunak. Definizio ezak gauza onak ditu, katalogatzeko gaitasuna ez dutenean jende gehiago zure inguruan batzeko aukera ematen du, baina aldi berean mugimenduaren kontra daudenak bertan integratzeko arriskua ere badago. Horren ondorioz, ekintzen bidezko identifikazioa beharrezkoa da. Hau da, mugimendua ezkerrekoa dela adierazi nahi ez baduzu ere, kapitalismoaren aurka azal zaitezke. Gai hau ez dago batere argi Donostiako kasuan!!!

7. Mugimenduak bere buruari ezarritako iraungitze data garrantzitsua izango da. Bi aukera bakarrik daudela uste dut eta horien artean ez dago kanpaleku etengabe eta helburu zehatzik gabe mantentzearena. Horrek mugimendua, epe luzerako gatazka batean bihurtuko luke eta jendea aspertzea ere ekar dezake, hau ez da Egipto alegia. Beharbada Madrilen (eta Bartzelonan?) beste dinamika batzuk eraman daitezke aurrera, baina gurean oso zaila iruditzen zait.

1. Hauteskundeetako emaitzak ikusirik, abisu moduko bat izan dela adierazi. Indar erakustaldi bat dela erakutsi, zehaztu eskakizun zerrenda bat (10 gauza) eta horiek betetzeko epe muga bat jarri (hurrengo hauteskundeak, baino 2 aste baino lehen adibidez). Mugimendua jendartean difuminatu (ez desagerrarazi) eta betetzen ez diren momentutik berriro ere aktibatzeko sareak eta harremanak landu. Honek helburu batzuk lortu direla erakutsi dezake kapital sozial guztia gordetzen.
2. Epe luzerako mugimendu batean bilakatu eta horretarako asanblada hutsetatik antolatzeko egitura sendoagoetara pasa beharko dira. Etengabeko asanbladak, lan talde txikiak, komisioak… Epe luzerako eta gauza konkretu batzuek lortzeko mobilizazio puntualetik haratago egitura beharrezkoak mantenduko dituen jende talde bat beharko da.

Bata edo beste edo biak aukera onak izan daitezkeela uste dut. Hala ere duda asko ditut mugimenduak izan dezakeen jarraikortasunaz.

Mobilizazio honetara bakoitza bere nahi, gogo, grin, behar eta dudekin gerturatzen da. Nik era positibo eta kritiko batean egin nahi izan dut, nire ekarpena txikia egiten, jakinda nire esperientzia pertsonaletik, nire borroka molde eta aldarrikapenetik egiten dudala. Nire proposamena hau da, foro honetan eta besteetan egiten dudana, indarrak batzeko gogoarekin eta jakinda bidelagun asko egon daitezkeela tartean.

• Demokrazia parte-hartzailerako bideak ezarri maila guztietan. Eragiten dieten eremuetako jendeari galdetuz (herria, eskualdea, herrialdea…). AHTren azpiegitura adibidez herrialde osoan eztabaidatu beharko litzateke eta parke berri bat sortzearen beharra herrian bertan.
• Kontrol herritarra, gardentasuna eta kontratu sozial baten beharra agintarientzat. Betetzen ez duten momentutik kargua galtzeko aukera ere ematen duena.
• Autodeterminazio eskubidearen onarpena demokrazia errealaren espresiobide bezala. Herriaren hitza eta erabakia errespetatzeko aukera zehatzak eta garbiak.
• Banku eta sistema finantzarioen erreskateen aurkako jarrera. Eta aldi berean herritarren arteko ekonomia sistema banatuak osatzeko arautegiak erraztu eta posible egin. Herritarren arteko kredituak ahalbidetu, p2p bankuak posible egin, kreditu kooperatiba txikiak eraikitzeko erraztasunak eman…
• Langile autonomoak eta kooperatibismoa (eta antzeko ereduak) sustatzeko politikak. Ekintzaile politika neoliberalaren ondoan, elkar-sormena sustatzeko eredu sozioekonomikoak garatu.
• Lanik gabe, lan prekarioarekin, lan istripuak izateko aukera duten, prekarietatearen feminizazioaren kontra eta orokorrean lan baldintza duinak egiteko aldarrikapen zehatzak bultzatu eta sindikatu borrokalariekin sinergiak bilatu. Lan munduari dagozkion erabakiak gertu hartzeko beharrarekin batera.
• Zerbitzu publikoak indartzeko jarrera. Zerbitzu publiko horien funtzionamendua ere herritarren aldetik fiskalizatuak izateko aukerarekin.
• Justiziaren erabateko erreforma eta eszepzio lege guztien deuseztapena. Audientzia Nazionalaren desagerpena eta alderdien legearen abolizioa adibidez. Gertuko justiziaren aldarrikapena, delituak gertatu diren lekutik gertu egin behar dira eta hauen kondenak ere gertu betetzeko beharra.
• Indar errepresio publiko eta pribatu arrotzen desagerpena eta bertakoen erreforma erabatekoa.
• Eskubide zibil eta politiko guztiak, pertsona guztientzat ziurtatzeko bideak ezarri. Horiek erasotzen dituzten ekintza konkretuak salatuz eta borrokatuz; tortura adibidez.
• Diru publikoz lagundutako guztia libre jarri lizentzia eta mekanismo juridiko askatzaileak baliatuz. Eduki eta software libreko politikak adibidez bultzatu eta inplementatu. Beharbada aldarrikapen hau lekuz kanpo iruditu ahal zaio norbaiti, baina mugimendu honen muinean errotuta dagoen eta oso garrantzitsua den aldarrikapen bat da.

Hauek dira, bat-batean eta hemendik nireak egingo nituzkeen aldarrikapen batzuk (boteprontoan ez pentsa gehiegi pentsatu ditudanik), baina Madriletik datorren manifestu interesgarrian ez dauden (edo era ezberdinean dauden) batzuk. Gauza asko utzi ditut seguru, baina testuingurura egokitutako proposamenak ere badira. Hau da, ez da programa politiko bat!

Zutitzen denari begirunea eta laguntza; egunero antolatzen eta borrokatzen duenari miresmena

Egoera honen iraultza oihu bat aukeratu beharko banu, niretzat hau litzateke eta honek bai, honek denak batzen gaitu

P.D: Hala ere, oraindik hari solte batzuk ditut buruan, errepresio indarren jarrera, hedabideek emandako oihartzuna…