Eguna iritsi da #kmk12

Gurasoek ikastolan sartu ninduten, hori izan zen Extremaduratik etorri, elkar ezagutu eta ni eduki ondoren hartu zuten erabaki garrantzitsuenetako bat; behintzat niretzat. Erabaki hori hartzeko argudioak, alde eta kontrakoak eztabaidatu eta erabakia hori izan zen.

Ez zen erabaki erraza izan nirea bezalako langile klaseko familia batentzat, baina egin beharrekotzat jo zuten. Euskaraz izan behar zuen nire hezkuntzak, beraiek baino aukera gehiago izateko eta herrian errotzeko. Horiek beraien argudioak behintzat.

Gero etorriko ziren, oraindik mina sortzen duten ikastola eta eskola publikoaren erabakiaren inguruko eztabaidak. Noski, nire familiak publikoaren alde egin zuen, baina… Hala ere, oraindik bertan mantentzea erabaki zuten.

Ikastolen mugimendutik gauza on eta txarrak entzuten ditut. Onak, asko baita topiko asko ere. Txar batzuk ere, asko zentzudunak betiko zentzugaberia batzuk kenduta noski. Aldaketak beharko dira eta eskola publikoarekin batera ikastolen izaera herritarra duen hezkuntza sistema euskalduna bermatu beharko dugu elkarlanean.

Baina gaur eguna iritsi da! Hainbeste zor diodan nire ikastolaren, Aita Manuel Larramendi ikastolaren egun iritsi da. Urtean zehar egindako auzolanak, ilusioak, grinak… bere fruituak emateko eguna eta horretarako zu behar zaitugu.

Gure aldetik, teknologiaren munduan gabiltzanon aldetik, opari bat prestatu dizuegu, ginKMKana.com. Baita ikastolako wifi sare librea ere Guifi.net proiektuaren eskutik; disfrutatu!

Atzo amak prezintoa erosi zuen eta aitarekin batera gunez-gune kartelak jartzeaz amaitu genuen. Biei eskerrak eman nahi dizkiet, laguntzagatik, baina batez ere hartutako erabakiengatik. Eskerrik asko aita ta ama.