Itsasontzia atera da

Etapa aldaketa garrantzitsuak egon dira nire bizitzan eta oraingoa ere oso garrantzitsua izango da. Elurnet-en pasa ditudan urteak oso onak izan dira eta bertan gelditzen dira Susi eta nire lankide-lagunak betiko lan ona egiten.

Baina orain gure irla mitikoko ispiritu eta grinarekin Talaios proiektuan murgilduko naiz. Ideia nahiko aurreratuta dago eta oraindik sortuta ez badago ere hasi gara jada kooperatiba txiki honen lehen lerroak idazten.

Oraindik kooperatiba bezala izena eman ez badugu ere zuetako batzuek Maite Goñiren bidez beharbada gure berri izan duzue. Euskaljakintza ekimenarekin lagundu diogu Maiteri, baina egia esan bera izan da bere proiektuari dioen maitasunagatik lan gehien egin duena.

Maitek bere mezuan oso ondo deskribatzen du Talaios-ek izan nahi duena:

analisia eta estrategia, prestakuntza eta ahalduntzea, tresnak eta garapenak egiten dituen aholkularitza teknologiko kooperatiba

Itsasotik berri gehiago iritsi bitartean, itsasontzia portutik atera dela jakin besterik ez; albiste berriekin portura bueltatzen denean jakingo duzue. Bagoaz!