Teketen » andoain

Greba deialdia Andoainen

teketen — Fri, 25 Jun 2010 06:27:19 +0000

Andoainen greba giroa hedatzen hasi da. Kalean kartelak ikusten dira, tabernetan sindikatuek utzitako informazioa, Savera-ko langileek kolorez bete dute herria duten gatazka ezagutzera emanez, CCOOren deialdia ere iritsi da… Bitartean sarean herritarrak greba.euskalherrian.info bidez antolatzen jarraitzen dute. Gaur deialdi irekia dago egun horretako jarraipena koordinatzeko eta tresna teknologikoei buruzko tailerrak egiteko. Deialdia bikoitza da, Bilbon eta Andoainen arratsaldeko 18:30etan. Andoaingo deialdia Itzalagunean izango da.

Atez ateak eztabaida eta dinamika berriak pizten

teketen — Sun, 06 Jun 2010 19:45:03 +0000

Aurreko batean, Donostian gauez gazte interesgarri bat topatu nuen. Bere lagunei atez atekoa azaltzen zegoen, hasierako dudak eztabaidatu eta uste dut nahiko ondo azaltzea lortu zuela. Momentu horretan DVko gauetako argazki-paparazzia sartu eta momentu hori jaso zuen. Seguraski atez atekoaren alde DVan esan den gauza bakarrenetakoa. Baina gazte hau ez da horretan gelditu Facebook talde bat ere sortu du, Donostian atez atekoa sutatzeko.
Proiektua aurrera doa eta gero eta gehiago zabaltzen ari da. Hainbat herri atez atekoa jartzearen alde agertzen ari dira. Beste hainbat tokitan, herritarrek, agintariei atez atekoaren aldeko apustua egitea eskatzen hasi dira.
Zailtasun handiak ere badaude, aurretik sortutako interesak eta batez ere eta era berezian alderdi batzuen erasoek zailtasunak jarriko dizkiote proiektuari.
Hala ere, oihartzuna Euskal Herritik kanpo ere iristen ari da. Aste honetan, Ecoperidikoak Recogida puerta a puerta, ejemplo de compromiso y concienciación popular argitaratu du adibidez.

Herritarrak atez ate

teketen — Fri, 14 May 2010 07:00:47 +0000

Atzo Kalakako saioan Atez ateko zabor bilketari buruz izan zen. Batzuen jarrera oso harrigarria suertatzen ari zait gai honetan. Herritarrek bere borondatez birziklatze sistema hobeago bat arazo gehigirik gabe aplikatzen hasi dira Usurbil, Hernani eta orain Oiartzunen. Oso pozgarria da, herritarren inplikazioa handia da, kontrako zenbait jarrera ere, baina horiek demokratikoki Usurbilen kasuan eta informazioarekin Hernaniren kasuan oso ondo betetzen ari dira.

Hala ere, Hamaikabat-en jarrera da gustatzen ez zaidana. Alderdi honek txoke indar moduan jokatzen du Errauskailua sortzeko interesak, ustezko birziklatze batean ezkutaturik. Atez atekoak beraiek proposatutako guztia eta gehiago egiten du, baina nahiago dute horren kontra jarri beraien interesak defendatzeko. EAJren jarrera ere tamalgarria da eta zentzu berean doa.

Baina, Aralar? Atzo, orain arte ia inoiz hitz egin ez zuen Oiartzungo Aralar mintzatu zen. Gasifikazioaren alde eta atez atekoaren guztiz kontra azaldu ez den arren, bidean aurkitutako arazoak baliatu nahi izaten ari da politikoki. Benetan, herritarren inplikazioa lortu duen eta inoiz baino birziklatze onena egitea lortu duten proiektuaren kontra jarriko dira azkenean? Alderdian bertan ere eztabaida piztu dute hitz hauek.

Ez dut ezer ulertzen, herri askok horrelako herritarrak izateagatik ordaindu ere egingo luke. Andoainen ere Atez ate askoz hobe!

Blogsoviet izugarria

teketen — Sun, 25 Apr 2010 20:38:07 +0000

Blogsovieta martxan jarri genuen larunbatean. Oso pozik atera nintzen bertatik, benetan zerbait garrantzitsua sortu zela uste dut. Gainera, antolatzeko era ere nahiko berezia eta kolektiboa sortu genuen. Niretzako ez da beste ekimen bat izan, sare banatuen mundua benetan ulertzen eta praktikan jartzen ari garela iruditu zitzaidan. Eskerrik asko, etorri zineten guztioi. Baita etorri ezin izan zutenei ere, aukera gehiago egongo dira ziur. Orain, sortu ziren blogak eta blogari berriak nola garatzen diren ikusten joan beharko dugu.

P.D: Batzuek galdetu zenidatenez, BacalHauen nengoela sentitu nuen eta uste dut (ziur nago) ez nengoela bakarrik.

Garzón, Errepublika eta Andoain

teketen — Thu, 22 Apr 2010 14:49:56 +0000

Aurreko astean, gerra zibiliean Andoainen fusilatutako 22 gudariei omenaldia egin zieten. Bertan gauza asko esan ziren, baina interesgarrienetakoa Oroituz kolektiboak irakurri zuen komunikatua. Honetan guztian Garzonek izandako papera, baita erakunde publikoen itxurakeria etab. aipatzen dituzte bertan.

Andoainen atez ate

teketen — Mon, 08 Mar 2010 07:00:24 +0000

Andoain zurituta

teketen — Mon, 08 Mar 2010 06:51:36 +0000

Andoain zurituta esnatu da.

Usabelartza

teketen — Sun, 07 Mar 2010 11:07:21 +0000

Adarrara igo baino, azkenean, exploratzaile lanetan ibili nintzen. Adarra igotzeko mila bide daude eta aspaldi hauetako batzuetatik ibili gabe negoen. Bideak gogoratu eta irteera megalitiko-kultural-gastronomiko potoloago bat prestatzeko balio izan dit behintzat. 5-6 ordutan egiteko txango bat dut buruan orain. Andoaindik hasi, Adarra inguruko estazio megalitikoa ikusi eta Besabin bazkaldu. Informazioa prest daukat, orain data erabaki beharko. Apuntatu nahi duenak esan dezala. Bestela ere txango motzagoak egiteko beti dago aukera.

Azkenean beraz, Leitzaran barna ibili nintzen. Bertxin, Lapurtxulo, Otita eta Usobelartzako zutarrian buelta.

KKKP Andoaingo gaztetxean

teketen — Fri, 26 Feb 2010 08:44:34 +0000

Hurrengo KKKPa Andoainen, Otsailak 27
Otsailak 27an Andoaingo gaztetxean elkartuko gara.
Oraingo honetan teoria alde batera utzi eta alde praktikoa landuko dugu gehienbat:
* OpenSimulation
* Arduinora sarrera
* Audioa sarean netjack2 erabiliz
12:00etan hasiko gara eta 14:00-15:00 artean bazkalduko dugu.
Animatu parte hartzera! Jatera etorri behar baduzu, abisatu zuretzat ere janaria egiteko

#egunkaria #libre

teketen — Sun, 27 Dec 2009 00:00:10 +0000

Goizean begiak ireki ditut berriak entzundakoan tristura jendearen aurpegietan nabaritzen da…». Horrela hasten da Kauta Andoaingo musika taldearen Zaharrak berri abestia. Hain zuzen ere, Egunkaria-ren itxiera zela-eta egun horretako sentipenak zein ziren oso ondo islatzen dituen abestia. Andoaindarra izanik, neuk ere, beste askok bezala, gertutik bizi izan genituen egun haiek, baita Interneten ere.

Gogoratzen ditut egun horietako emozioak, baita Indymedia Euskal Herrian izan zen mugimendua ere. Gau horietan Egunero-ren bertsio digitalak lortu eta jendearen esku jartzen zituzten zenbait lagunek. Beste batzuek informazioa eta kontaktuak egiten zituzten bitartean. Garai horietan Internet ez zegoen hain hedatua eta barneratua. Orain, gertatutakoa beste era batera izango litzateke, baita Interneten ere. Beharbada, gaur dugun informazioa lortu eta hedatzeko aukerak egoera beste era batera bideratzea lortuko zuen, baina hori ezin jakin.

Orain, auziaren hasierarekin batera, Internet ere mugitzen hasi da. Jende askok jarri du jada, egunkariaren aldeko irudia bere blogetan. Beste askok, horretaz gain, horrekin loturiko informazioak automatikoki publikatzen dituen tresna bat ere ipini du bere webgune edo blogaren txokoren batean. Hainbat webgune eta blogek jarraipen zuzena egin dute: http://berria. info, http://www.javierortiz.net/voz/egunkaria, http://egunkaria.info… Twitter (http://twitter.com) sarearen bidez ehunka pertsonak elkartasun mezuak eta informazioak bidali dituzte #egunkaria eta #libre etiketak erabiliz.

Baina orain dugu aukera. Erantzutea baino, etorkizuna esperimentatzeko aukera. Horregatik, http://egunkarialibre.info webgunea ere sortu da. Beste webguneekin batera jarraipena egitea helburu izateaz gain, komunikazio esperimentu moduan ere. Hurrengo larunbatean, Bilbon egingo den manifestazioaren berri ematea du lehen helburua. Egun horretan jendeak bidalitako irudiak, bideoak, mezuak, lanak, ideiak bildu eta Interneten zehar zabaltzen saiatzeko, ekimen parte-hartzaile hau bideratu dute. Ordua jarrita dago: larunbat honetan, 12:00etan, Bilboko Kafe Antzokiko atarian. Abestian bezala, gureak diren gauzak zabalduz eta gure indarrak batuz, egun horretan ere «Egunkaria Libre!» esango dugu.

Berria.info webgunean | PDF bertsioa | Inprimatzeko bertsioa

Berriako Irlen Sarea atalean argitaratutako artikulua

Honekin loturik Info7 irratiko audio [mp3] [ogg] elkarrizketa.

[podcast]http://teketen.com/wp-content/uploads/2009/12/egunkaria_libre.mp3[/podcast]