Goizean egon ez banintzen ere, badirudi gauza interesgarriak esan zirela. Arratsaldean gure txanda iritsi zen aipatutako munstroekin. Behin amaituta balantze txiki bat egiteko aukera daukat.

iPtx http://twitgoo.com/k4uwn

Lekua

Izugarria, kapila txiki bat eta santuak atzean. Antolatzaileetako batek esan zidan kitsch kutxu bat ematen ziola ekitaldiari eta ados nago. Oso toki bitxia, bakoitzak bere iritzia izan dezake, baina niri puntazo bat iruditu zitzaidan. Hala ere nire “santuak” beste batzuk direla [1] [2] [3] [4] [5] [6] [7] ez dut esan beharrik ere.

Teknika

Konexioa ona, pantaila altarean eta audioa ere oso ondo. Windows sistema eragilea portatilean, baina beno Firefox zegoen. Livestream bidez, ere emititu zuten ekitaldia eta momentu batzuetan 20 pertsona inguru egon ziren ikusten. Pena da, audioak ez zuela guztiz ondo funtzionatu. Hala ere, Twitter bidez jendearen ekarpen batzuk jaso genituen Internetetik.

Eztabaida

Mahaingurua ondo joan zen, gauza garrantzitsuak esan ziren, bakoitzak bere testuingurutik. Batez ere, Iñako eta Ibanen jarrera gustatu zitzaidan. Oso jarrera irekia telebista ohikoetatik etorrita. Internetera eta parte hartzera guztiz irekia, nahiz eta oraindik beraien proiektuetan besteek egiten dutena ikusgai egitea den beraien apostu. Etorkizuneko proiektuek indar handia dutela uste dut. Jexux Mari Interneteko hedabide batetik etorrita ere, nahiko eszeptiko ikusi nuen. Parte hartzeari beldur apur batekin. Beharbada berari gertatutakoen ondorioz, baina harritu ninduen Interneteko proiektu batetik etorrita.

Nik ez nuen iritzi gehiegi eman nahi izan, baina honekin loturik gaurko Berriako irlen sarea idatzi nuen Komunikaldiak-era etorri aurretik. Nire iritzietako batzuk laburtuz.

Batez ere ekarpen hauek nabarmendu nahiko nituzke:

Iban Arantzabal (Goiena)

• Interneten soberan dago lasto guztia.
  • Lasto = “edukia zuzenean ez den beste guztia”.
• LTDk ez du balio jendearekin elkarreragiteko. Baietz esan ziguten, baina ez.
• Posta zerrendek asko hobeto funtzionatzen dute, kontrolik gabeko foroek baino. Gardentasun kontua da.
• Gaur egun nekez uler daiteke kazetari bat blogik edo Twitter kontu bat ez duenik.
• Kale kazetaritzak gero eta indar handiagoa hartuko du.

Iñako Gurrutxaga (ETB3)

• Gainditzear gaude telebista tradizionalak audientziei izandako menpekotasuna.
• Sekulako arazoak izan genituen bideo blog bat bilatzeko euskaraz. Ez dago joerarik arriskatzeko.
• Asko begiratu diegu current.tv eta beste eredu batzuei, ikuslearen parte hartzea bultzatzen dutenak.
• grebaorokorra.info edo egunkarialibre.info bezalako gerrila komunikazio ekintzak oso interesgarriak dira. 2-3 pertsona, biltzen direnak bildu eta ahal dituzten baliabideekin, interesagatik egiten dituzten ekimen informatiboak, garrantzi handia dute.
• Puntukam, kamara bat eman eta bakoitzak bere programa grabatzeko ekimen interesgarriak ez du espero genezakeen arrakasta izan, baina apustua sendoa da.

Jesus Mari (Bertsoa.com)

• Bertsoaren inguruan saio asko dago, baina horietako asko ezin dira jarraitu ikusi Internetetik. Hori da gure helburua, momentu handiez gain, bertrsolari txapelketak adibidez, bertsolaritzaren mundua etxetik ere ikusteko aukera izatea. Saio horiek txikiak edo oso lokalak badira ere.

Publikoa

Jende oso interesgarria ikusi nuen publikoan. Ikus-entzunezko mundukoa, Interneteko ezaguna, irakasleak… Parte-hartzea aldiz nahiko txikia izan zen. Pare batek parte hartu zuten, hori bai eztabaida piztea lortu zuten. Bertan zeuden ikasleak, behartuta edo ia-behartuta joan zirela kontutan hartuta normala izan daitekeela uste dut. Zilegi izan edo ez, hori ez litzateke horrela izan beharko. Ikasle horiek irakasleak eta unibertsitatea etsaitzat jotzea lortzen da horrela. Beste bide batzuk ikertu beharko lirateke.

Nire aldetik ahal nuen guztia egin nuen, beraien interesekin bat egiteko. Autokritika egin nahi dut hala ere, argi daukat hauetako batzuei ez geniela beraien kodigoetan hitz egin. Zaila izango da, baina lortu nahi nuen eta behintzat parte hartze zuzenik ez nuen lortu. “Es lo que hay” jarrera gehiegi? Motibazio falta? Bakoitzak bere ondorioak aterako ditu. Nik autokritika, zerbait gaizki egin nuen, seguru. Gazte hauek inplikatzea lortu behar dugu eta horretarako ekitaldiaren parte sentitu beharko lirateke. Hala ere, batzuek gero esan zidaten interesgarria iruditu zitzaiela. Pare bat bildu ziren niregana eskerrak emanez. Aupa zuek! Orain bideoak sareratzera!

Antolakuntza

Komunikaldiak-en inguruan bildu zen lan taldea zoragarria izan zen. Joxe Arantzabal-ek atentzioz zaintzen zituen partaide guztiak. Aitor Arregi, Lucio dokumentalaren egileak ondo eraman zituen denbora eta azpiegitura atalak. Baina, barkatuko didazue, baina nik Amaia Txintxurretari eskertu behar diot egindako guztia. Beti egon zen laguntzeko presto. Eskerrik asko Amaia. Ea hurrengo urteetan hizlarien artean zu eta falta izan ziren emakumeak ikusteko aukera dugun.

Hurrengo bat arte!