Hasieratik Internet adierazpen askatasuna gauzatzeko biderik askeena izan da. Orain arte horrela izan bada ere, gero eta eraso gehiago dago askatasun horren aurka. Azkena, AEBetan blogetery.com sareko 73.000 blogen itxiera. Arrazoi argirik ez dago, baina badirudi gobernuko segurtasun agentzia batek itxi duela, terrorismoarekin erlazionaturiko mugimenduak direla eta.

Badirudi arrazoi gutxi behar direla ez blog bakarra, baizik eta milaka saretik kanporatzeko. Baina, gurean ere horrelakoak gertatu izan dira. Espainiako Estatuaren historiala nahiko handia da. Batasuna.org webgunea saretik kanpo utzi zutenetik, gero eta gehiago izan dira, azkena Gaztesarea.net.

Facebook Interneteko sare sozial ezagunak ere, 4.600 jarraitzaile zituen Arnaldo Otegiren orrialdea itxi du bitan. Berriro ere arrazoiak garbi utzi gabe. Hala ere, jada beste orrialde bat sortu dute, eta Arnaldotegi.com ere abian da.

Hori dena gutxi balitz, AEBetako Gobernuak neurri gogorragoak proposatzeko bideak ireki ditzake. AEBetako presidenteari emergentzia egoeran Internet osoa edo parte bat itzaltzeko aukera emango liokeena.

Beraz, gero eta garrantzitsuagoak dira adierazpen eta informazio askatasuna ziurtatuko duten Wikileaks.org bezlako ekimenak martxan jartzea. Iraken AEBetako armadak zibilak hiltzen grabatutako bideo bat zabaldu zuenean egin zen ezagun ekimen hori. Ekimen horrek beste hainbat gauza ere lortu ditu: ACTA izenez ezaguna den egile eskubideen inguruko eta eskubide urraketa garbiak barne hartzen dituen akordioaren agiria zabaltzea.

Ekimen hori baino zabalagoa eta garrantzitsuagoa izan da Islandiako Gobernuaren Icelandic Modern Media Initiative IMMI izenekoa. Horren bidez, Islandia ikerketa kazetaritzaren paradisua izango da. Informazioa askatasun guztiarekin zabaltzeko aukerak eman nahi ditu, gardentasuna eta anonimotasuna ziurtatuz.

Egoera ikusita, gure sare propioak eraikitzen hasi beharko dugu, Guifi.net proiektuak egiten duen moduan. Baina bitartean bakoitzak ahal duen neurrian bere bloga, bere komunitate txikia edo Interneteko sare sozial gertuagokoak eraikitzen joatea garrantzitsua izango da. Hitzez aurre egitea garrantzitsua da, baina ekintzak behar dira.

Berriako Irlen Sarea atalean argitaratutako artikulua

Berrikuntzari buruz asko hitz egiten da gaur egun. Askotan, berrikuntza hori handitasunean oinarrituta egon ohi da. Enpresa handiak, proiektu handiak, etekin handiak… baina berrikuntza, hastapenetan behintzat, gauza txikietan egon ohi da. Pertsona, talde txiki batek ideia bat sortu eta batez ere hobetu eta martxan jartzeko gaitasunean. Berrikuntzaren nire ikuspegia horixe da, txikitik handira eta benetakoa den berrikuntza bat. Etekinak sortzeko gai den berrikuntza, baina etekin horiek ekonomikoak izan beharrik izan gabe.

Berrikuntza soziala bultzatzen duen komunitate hacktibista auto-eratuak dira horren parte. Internetek eta teknologiek ematen dizkieten aukerak erabiliz eta ekinez beren testuingurua hobetzeko gai diren komunitateak. Beren herriarentzat, auzoarentzat, lurraldearentzat edo munduarentzat interesgarriak diren ekimenak sustatzeko gai diren komunitateak. Ezagutza teknologikoa eta mugimendu sozialak elkartzen diren puntuan sortzen diren auzolan komunitateak. Horietan interesgarrienetako bat Txintxarrisfera da.

Txintxarrisfera, Alegia aldeko blogari komunitate birtuala da. Bertan, Alegia, Ugarte, Bedaio, Altzoko blogariak biltzen dira. Hasieran, bakoitza bere aldetik blog pertsonalak sortzen hasi ziren, eta gero, Txintxarrisfera sortu zuten. Txintxarrisfera orain blogek, wikiak, Txintxarrimedia (sare soziala, 1.000 argazki baino gehiago, 96 bideo, eztabaida ekitaldiak…), Txintxarribista telebistak eta abarrek osatzen dute. Teknologiari esker herri horietan guztietan zeuden dinamikak piztu eta egituratzeko gai izan den komunitate oso bat sortzea lortu dute, alegia. Diruz ordainduta ere, zaila izango litzateke hori lortzea.

Teknologiari esker egituratutako komunitate horiek ez dira soilik birtualak: oso errealak izan ohi dira, eta Txintxarrisferaren kasuan ere horrela da. Ofizialki urtean bi alditan elkartzen badira ere, oso maiz egoten dira, proposatzen dituzten ekimenei esker. Ekainaren 11rako 3. Blogs & Beers ekimen irekia (blogak eta garagardoak) antolatu dute Alegian, 19:30ean. Internetzale euskaldunak biltzeko nahiarekin sortu dute ekimena oraingoan, komunitatea ireki eta beste hainbat pertsonarekin giro atseginean eztabaidatu eta solasean aritzeko. Eztabaida interesgarriak izango dituzte, ziur.

Berriako Irlen Sarean argitaratutako artikulua

Blogek bakoitzaren ideiak komunikatzeko aukera eman dute. Blogen eztanda izan zenean, zerbitzu asko sortu ziren; famatua egin zirenetako bat Blogger izan zen, gero Googlek erosiko zuena. Horrekin batera eta paraleloan, blogak sortzeko tresnak sortuz joan ziren. Gehien erabilitakoa, WordPress, software librekoa. Orain WordPressek bere 3.0 bertsioa kaleratuko du, informazioa publikatu eta kudeatzeko aukera aurreratuak eskaintzen dituena.

WordPressen bertsio berriak eduki kudeaketako sistema oso (EKS) bilakatuko du orain arte blogak sortzeko zen plataforma. WordPressen sinpletasuna galdu gabe, blogak sortzeko baino gehiago balioko du tresna horrek aurrerantzean. Pertsona eta erakunde askok blogak sortzeko baino gehiago erabiltzen zuten aurretik: CNN, WST, National Geographic, Coca Cola, Pepsi, Nikon, Nokia… besteak beste. Baina orain benetako komunikazio tresna garrantzitsu bilakatuko da WordPress.

Eguneraketen artean, menuak pertsonalizatzeko aukera dago. Menu berriak sortu eta webgunearen egituraketa errazago bat lortzen laguntzeko. Mezu mota berriak sortzeko aukera ere badago, orain arteko orrialde eta mezu arruntez gain. Mezu bakoitzak bere ezaugarri, eremu eta forma propioak izan ditzake. Blogen itxura lehenetsia ere aldatuko da. Itxura lehenetsi berria sinplea baina txukunagoa izango da, eta pertsonalizatzeko aukera gehiago izango ditu.

Baina aldaketa garrantzitsuena instalazio bakarrarekin blog bat baino gehiago izateko aukera izango da. Zerbitzari batean WordPress instalatuta, nahi adina blog sortu ahal izango dira, klik gutxi batzuetan. Horrek erraztu egingo du pertsona bakoitzak eta batez ere komunitate bakoitzak bere blog sarea sortzeko aukera izatea. Horrela bakoitza bere datu eta aldaketen kontrol handiagoa izango du; beste pauso bat subiranotasunean. Baina hasieran esan dugun moduan, WordPress berria blog sareak sortzeko baino gehiagorako balioko du. Pertsona, talde, proiektu bakoitzak bere hedabide txiki propioa izateko erraztasun guztiak izango ditu. Orain arte, blogen artean sare zabal bat genuen, blogosfera, beren artean elkar ulertzen zuten tresnaz osatua. Blogosfera hori, orain, WordPress berriari esker, hedabide banatu sendoagoa bihurtuko da.

Berriako Irlen Sarea atalean argitaratutako artikulua

Etengabe etorkizunari begira egoten gara, baina askotan gelditu eta atzean utzitakoari begiratzea ere komeni da. Interneten aldaketak hamarkadaka neurtu izan dira.

Azpiegiturara begiratuz, banda zabala eta WIFI sareen sozializazioa izan dira gauzarik garrantzitsuenak. Lehenengoek posible ez ziren gauza asko posible egin dituzte; HD bideoak ikusteko aukera, adibidez. Bigarrenek Internet askoz leku gehiagotatik erabiltzea lortu dute.

Tresnen aldetik, blogak eta haien artean sortzen den eztabaida eta parte-hartzea sustatzeko sareak izan dira garrantzitsuena. Blogosfera, hedabide banatu eta parte-hartzaile sortuz. Eztabaidak gauzatu eta momentu batzuetan agenda publikoa ere baldintzatzea lor dezakeen hedabide bat. Blogekin batera, batez ere beste tresna batzuen sozializazioa gertatu da. Jarioek, adibidez, hainbat iturritara harpidetzeko aukera ireki dute. Baita bakoitzak bere informazioa igorri eta gero informazio hau batzeko aukera ere.

Komunikazio pertsonalaren esparruan, aukera gehiago ireki dira. Posta elektronikoa, tresna asinkrono eta pribatua izateari eutsi dio. Gainera, berrikuntzak ere izan ditu; IMAP protokoloaren erabilera, kasu. Baina horretaz gain, berehalako mezularitzaren arrakasta etorri zen. Berehalako komunikazio, sinkrono pertsonala egiteko erabiltzen da hau. Baina, horretaz gain, azken garaien genero berri bat ere agertu da. Berehalako mezularitza asinkrono soziala bezala definitu daitekeena. Twitter da horren adibide garbiena.

Enpresei begiratuz gero, Googleren hamarkada izan dela argi dago. Bere bilatzailetik abiatu, eta posta elektroniko, berehalako mezularitza, dokumentuen kudeaketa, egutegiak, bideoa… esparru guztietan sartu da. Beti informazioa eskuratzeko nahiarekin, ondoren publizitatea Adsense bidez saltzeko intentzioarekin. Zenbait momentutan pribatutasuna ere zalantzan jarrita.

Baina aldaketa garrantzitsuenetako bat software libreak izandako eztanda izan da. Zerbitzarietan batez ere, baina mahaigaineko ordenagailuetan eta eramangarrietan ere aukera handiak ireki dituzte. Software libreari esker, pertsona, talde eta enpresa txikiek ere beren tresna propioak sortu ahal izan dituzte (beste batzuk oinarri hartuta) eta ekonomikoki ere egingarriak izan dira gauza asko.

Berria.info webgunean | PDF bertsioa | Inprimatzeko bertsioa

Berriako Irlen Sarea atalean argitaratutako artikulua

Eusko Jaurlaritzako Turismo Sailak turistak erakartzeko kanpaina berritzaile bat abian jarri nahi du. Kanpainaren barnean, eragina duten zenbait blogari kontratatu nahi dituzte, zenbait ekitaldi eta leku promozionatu nahian. Oso positiboa da Eusko Jaurlaritza Internetek gai hauetan duen eraginaz konturatzea. Baina, aldi berean, sarean duten gabezia era artifizial batean, blogari batzuk diruz kontrataturik, bete nahi dutela erakusten dute. Blogosferan turistak beraiek direla eraku-tsiz.

Oso ohikoa da pentsatzea eragin handiena duten blogariak gure mezuak errazen garraiatzeko aukera ematen dutenak direla. Baina, blogosferaren egiturarengatik, elkarrizketak blogez blog, mezu eta erantzunen bidez ematen dira. Beharbada, blogari horren eragina bere gertuko sarean gelditzen da. Horrenbestez, ez du mezua sare horretatik kanpo eramango.

Hori blogosfera sare banatu bat delako gertatzen da, zentrorik gabeko sare bat. Bertan konexio hobeak dituzten pertsonak badaude ere, mezua edozein zirrikitutatik igaro daiteke. Ustez garrantzi handia ez duen blog bateko aipamen batek, adibidez, aldaketa handia sor dezake.

Horretaz gain, blogosferan partekatutako «kode etiko» bat ere badago. Zintzoki jokatzea eskatzen da. Idazten duen pertsonak iritzia botatzen du eta duen sinesgarritasunagatik da garrantzitsua. Horregatik ordainketa, horren aurka jo dezake. Berez, ez dago arazo handiegirik eta blogari bakoitzaren eskuetan geratzen da egitea edo ez. Baina betiere iritzia bideratzeko saioak gaizki ikusiak izan daitezke.

Nik beste era batean planteatuko nuke. Gai hauen inguruan interesa erakutsi duten blogariak topatuko nituzke eta informazioa zuzenean eskaini. Batez ere etortzeko joera izan dituzten kolektiboen artean. Haiekin era zuzenean eztabaidatu eta interesatzen zaizkien gauzak ezagutu ondoren kanal berriak irekiz. Era berean, orain arte etorri direnen iritziak jasoko nituzke, hausnartu eta hobetzeko aukerak ikusi. Eduki txukunak sortzen edo sortutakoak biltzen ere saiatuko nintzateke. Baina, batez ere, eta blogek sortzen duten eztabaidan parte hartu nahiko banu, beste baten moduan elkarrizketan murgilduko nintzateke; berdintasunez eta zintzoki. Prest daude horretarako gure agintariak?

Berria.info webgunean | PDF bertsioa | Inprimatzeko bertsioa

Berriako Irlen Sarea atalean argitaratutako artikulua.

Honekin loturik Info7 irratiko audio [mp3] [ogg] elkarrizketa.