Teketen

Asteleheneko ETB1eko albistegien audientziak hauek izan ziren gutxi gora behera. Eguerdikoak, 16.000 ikusle eta gauekoak aldiz 6.000 ikusle inguru. Bai nahiko gutxi da, baina hori beste egun baterako. Audientziak kontatzeko era ere oso eztabaidagarria da hedabide honetan, baina telebista eta Interneteko mundua lotzea lortzen duen estatistika bat badago, ikusitako minutuena. Azken finean, hori da garrantzitsua, zure informazioaren zenbat kontsumitu den.

Berria.info-k absoluzioaren gaineko emanaldi bat egin du, zuzeneko telebista bat. Ez hori bakarrik, twitterren gertatzen ari zena ere bere portadan jarri du. Momentu batean #egunkaria etiketa erabilien artean jartzea lortu da. Interneten ere bere blogariek, parte hartzea sustatu eta Interneten murgiltzen hasi dira. Oso pauso garrantzitsuak egiten hasi dira eta oso ondo gainera. Zorionak.

Auzipetuen absoluzioa erakusten zuen saio bereziaren datuak argigarriak dira. Enpresa, erakunde, talde, pertsona batek bere informazioa gizarteratu nahi duenean, informazio horri zabalkunde maximoa eman nahi dio. Gainera, informazio hori ahal bada behintzat erabakitako forman eta bitartekaririk gabe ematea ere interesgarria izaten da. Ba hori da zehazki Berria Telebistaren bidez lortu dutena.

Momentu berean 333 ikusle izatera iritsi da momentu batean. Horretaz gain, ondoren ere 200 ikusleko bisita jarraituak izaten egon dira. Saioa errepikatzen egon direnez, ez dakigu guztira zenbat ikusle egon diren ikusten. Beraz kuantitatiboki ikusle kopuruen arteko konparaketa bat egitea zaila izan daiteke. Baina, aldiz ikusitako minutuen araberako konparaketa egin daiteke.

Albistegi batean, albistegi bati eskaini diezaioketen denbora maximoa, 3 minutukoa dela onartzen badugu. Adibide moduan egun horretako albiste hau. Eta, Berria Telebistak azken 24 orduetan 44.600 minutu ikusi izan dituela kontutan hartzen badugu, konparaketa hau egin dezakegu, ikusitako minutuen inguruan:

• ETB1 eguerdiko albistegia: 16.000 * 3 = 48.000 minutu
• ETB1 gaueko albistegia: 6.000 * 3 = 18.000 minutu
• Berria telebista azken saioa: 44.600 minutu

Beraz esan daiteke Berria Telebistako, ikusitako minutuei begiratzen badiogu, ETB1eko gaueko teleberriaren ia hirukoitza lortu dela eta gaueko albistegiaren minutu kopurutik oso gertu dagoela.

Datu hauek saio horri buruzkoak bakarrik dira. Baina, beste datu batzuk ere interesgarriak dira. Berria.info-ko adierazitako 30.000 bisitariak adibidez.

Hala ere, datuetan galdu gabe, atal kualitatiboari ere begirada bat bota nahiko nioke. Alde batetik, ikusle hauek ez dira telebistako ikusleak bezalakoak. Normalean saioa ikusi ahal izateko, erabiltzaile aktiboak izan behar dira, webgunera sartzera erabaki dute edo blogen/sare sozialen bidez sartu dira ikustera. Seguraski gehienak sareetan pertsona aktiboak dira. Konpromezuaren piramidean, nahiko goian egon daitezkeenak. Hori ere kontutan hartu behar da.

Ondorioak argiak dira, jendearen parte-hartzea eta zuzeneko informazioa lantzen direnean, Internetek eskaintzen dituen tresnak baliatuz, emaitzak positiboak izaten dira. Bitartekaririk gabe, gure mezuak zabaldu eta horien inguruak komunitateak biltzea gero eta errazagoa da.

Hedabideen arteko nahasketa eta elkarlanarekin genero berritzaileak probatzeko ordua iritsi dela uste dut. Transmedia saio polit honen ondoren, beste batzuk etorri behar dira. Arrakasta hau puntuala da noski. Etorkizuneko saioek beharbada ez dute hainbeste izango, baina argi uzten dute bide bat ireki daitekeela, etorkizunean ere arrakasta handiagoak ekar ditzakeen bide bat.