Teketen » elurnet

Blogintza eta Sustatu.com-en inguruan

teketen — Fri, 03 Jul 2009 09:55:17 +0000

CodeSyntaxeko jendeak gonbidatuta Eibarren egongo naiz uztailaren 8an. Blogintza, Sustatu.com-en etorkizuna eta telebista mota posibleei buruz hitz egin eta eztabaidatzeko aukera dugu. Hau da egitarau osoa:

CodeSyntax Tailerraren hurrengo jardunaldi irekia uztailaren 8an izango da, arratsaldez, gure bulegoan. Izenburu hau jarri diogu topaketari: “Zer egin daiteke Sustaturekin? / Euskal blogintza pentsatu 2010eko hamarkadarako.”

Uztailak 8, asteazkena, izango da hitzordua CodeSyntax-en egoitzan, Eibarren, 16.00etan. Izenburu bikoitz honen inguruan antolatu dugu jardunaldi hau: “Zer egin daiteke Sustaturekin? / Euskal blogintza pentsatu 2010eko hamarkadarako”

Sustatu.com: blog, hedabide, edo ze demontre (Luistxo Fernandez, CodeSyntax)
Mikroblogintza sozialaren erronka: Twitter, Tuenti eta Facebooke eragina (Maite Goñi, Ordiziako Jakintza ikastola, IKTeroak, Euskaljakintza)
Telebista pertsonal/taldekoak, edo hurrengo hamarkadako TB mugikor eta distribuituak. (Gorka Julio Teketen; Elurnet, Arraytxiki)
Berbeta edo gogoeta partekatua

Ekitaldi irekia izango da, doakoa noski, izena emateko bete formulario hau.

Ubuntu

teketen — Wed, 01 Jul 2009 20:26:15 +0000

Ubuntu argi dago GNU/Linux banaketa arrakastatsuenetako batean bilakatu dela. Asko dira honi buruz Interneten eskuratu daitezkeen informazioak. Ubunturen gune ofizialean laguntza gunea oso garrantzitsua da. Bertan informazioa eta galderak egiteko aukera dago. Horretaz gain, informazioa lasai irakurri nahi badugu liburuak ere badaude. Horietako batzuk ordaindu behar badira ere, beste asko ez. Horietako bat Ubuntu Pocket Guide and Reference.

Euskarazko ekarpen txiki bat egin nahi dut hemendik. Ubuntu aurkeztu eta erreferentziazkoak diren zenbait aplikazio erakusteko. Elurneteko orritik PDFan jaitsi dezakezue, baina bestela zuzenean aurkezpenaren gainean klikatuz ikusteko aukera ere baduzue.

Nabaztag eta Tux zortziko txikian

teketen — Wed, 06 May 2009 15:59:07 +0000

Elurnet-en Gauzen Internetarekin lehen esperimentuak hasi ditugu. Oraingoan, Nabaztag eta Tux bertsotan jarri ditugu eta momentu hunkigarri hau zuekin guztiekin partekatu nahi dugu.

Web mugikorra ikastaroak euskaraz!

teketen — Mon, 16 Mar 2009 11:04:35 +0000

Azken aldian, Elurneten interes berezia jartzen ari gara Web mugikorraren inguruan. Horregatik, Web mugikorraren inguruko ikastaro batzuk prestatu ditugu eta euskaraz izango dira eta irakaslea asmatuko zenuten ni neu.

UEUrekin batera Eibarko Markeskoan: Martxoak 25 eta Apirilak 1 (9:30-13:30) Izen eman
Enpresadigitalarekin batera Gipuzkoako Miramon parke teknologikoan: Apirilak 21,22 (9:30-13:30). Izen eman

Ikastaro hauetan interesatuak zaudetenak izen eman eta ahal duenak informazioa zabalduko balu, eskertuko genioke. Garrantzitsua da erakustea ikastaro hauek ere audientzia minimo bat dutela, euskarazko formakuntza ere programatzen jarraitzeko. Esker mila guztiei!

Ziberekintzaile izan zaitez!

teketen — Sun, 15 Feb 2009 10:45:22 +0000

Esku-era jardunalidetan eman nuen hitzaldiaren bideoa igo dute topaguneko lagunek. Egon ez zinetenak nire hitzaldia ikusi eta entzuteko aukera izango duzue orain. Ziberekintzailetasunari buruzko aurkezpena ere blog honetan duzue eta teoria praktikan jartzeko ez zaizkigu aukerak falta zoritxarrez.

Post Esku-era

teketen — Fri, 23 Jan 2009 19:41:45 +0000

Esku-era jardunaldietan egindako aurkezpena denon eskura jartzen dut. Hemendik aurrera zenbait aurkezpen Elurneteko dokumentazio, aurkezpen, manual etab. material didaktikoen biltokian topatu ahal izango dituzue. Denok baliatu, eztabaidatu, moldatu, kakaztu, zabaldu eta gozatu dezagun. Zuen sorkuntza ere garrantzitsua dela gogoratu eta egiten dituzuen ekarpenei esku-era etiketa jartzen saiatu.

Zorionak Twitter bidez jarraipena egiten egon zareten Topagunea, iPtx eta Joxeri. Antolatzaileei, BilboRockeko langileei, nireki batera taula gainean eta azpian egon zareten guztioi.

Oso gustora egon naiz zuekin guztiekin eta jende oso aberasgarritik gertu bizi naizela ikasi dut. Beste noizbait elkarrekin hitz egin, eztabaidatu eta gure sare banatuko lokarri gehiago eraikitzeko esperantzarekin mezu hau zabaltzen dut gure blogosferarara, ea norbaitek jasotzen duen.

Azkenin ezin eskertu gabe utzi bazkaria alaitu digun Miren Azkarateren abestiaren egileei eta zergatik ez berari ere!

Esku-era, bazatoz?

teketen — Thu, 22 Jan 2009 21:41:24 +0000

Bihar Esku-era jardunaldietan egongo naiz hizlari moduan Aukerak eta esperientziak atalean. Bertan egongo dira baita Funky Projects-eko jendea eta Iñaki Dorronsoro. Facebook erabiltzen baduzu bertaratuko zaren edo ez adierazi dezakezu Esku-era ekitaldian, nahiz eta ez den beharrezkoa izen ematea inon.

Nire gaia Ziberekintzailea naiz eta zu? izango da. Sare eta komunitateak komunikatzeko, erlazionatzeko, sortzeko, bizitzeko sortzen ditugu eta Internetek, sare horiek antolatu eta eraikitzeko aukera gehiago ematen diguten tresnak eskaintzen ditu. Sare eta komunitate birtualen garai hauetan ziberekintzaile izatera behartuta gaude. Testuinguru honetan pertsonen, taldeen eta erakundeen papera aldatu egiten da. Gauzak egin, sortu, komunikatu, erlazioak egiteko erak aldatu egiten dira eta horietara egokitu eta erabiltzen ikasten jakin behar dugu.

Ziberekimen bat aurrera eramateko kanpaina bat nola egin daitekeen, tresna interesgarrienak ezagutu, sorkuntza azkartu edo hobeto egin ahal izateko elementu katalizatzaileak zein diren jakin eta Interneteko sarean gure ekimenak aurrera nola eraman izango dira aurkezpen honen elementu garrantzitsuenak.

Web móvil ikastaroaren aurkezpena

teketen — Tue, 16 Dec 2008 15:37:51 +0000

Hemen uzten dizuet Web mugikorrari buruz emandako ikastaroaren aurkezpena. Gazteleraz dago ikastaroa horrela izan zelako baina euskaraz egin behar badut euskarazko bertsioa ere igoko dut. Hemendik aurrera ikastaroen aurkezpenak Elurneten webgunean ere igoko ditut. Disfrutatu!

Informazioa, edukiak sindikatzeari esker, parte hartuz kudeatzea

teketen — Fri, 26 Sep 2008 09:38:40 +0000

IKASTAROA: INFORMAZIOA, EDUKIAK SINDIKATZEARI ESKER, PARTE HATUZ KUDEATZEA (EUSKARAZ)

IZEN EMAN >>

Hasiera data: 2008/09/30
Amaiera data: 2008/10/02
Ordutegia: 15.00etatik 19.00etara
Iraupena: 12 ordu
Enpresa: Elurnet Informatika Zerbitzuak S.L.
Antolatzailea: Miramon Enpresa Digitala

Deskribapena:

Edukiak sindikatzearen erabilera blogen gorakada gertatu arte hedatu ez bada ere, gaur egun eremu horretatik irten da eta ia edozein lekutan sindikatzeko aukera aurki dezakegu. Horri esker informazio-iturri askotan eman dezakegu izena eta informazioa etengabe jaso dezakegu.

Gero eta garrantzi handiagoa du informazioa era egokian kudeatzeak. Tresna horien bitartez, gure sektoreko albisteak ezagut ditzakegu, gure enpresari edo gure sozietateari edo taldeari buruz zer esaten den jakin dezakegu, alertak jaso ditzakegu, etab.

Informazioa jasotzeko aukeraz gain, informazioa trukatzeko modua ere eskaintzen du (taldeen artean, modu publikoan edo pribatuan), parte-hartze deszentralizatu baten bidezko hartu-emanean.

Gure edukiak geure ingurunetik kanpo hedatzeko aukera eskaintzen digute.

Formatu estandarrari esker, gure edukiak milaka lekutara heda ditzakegu, oso ahalegin txikiarekin.

Gaur egungo Interneten parte hartzen duten enpresa, sozietate eta taldeek entzun egin behar dute eta tresna berritzaileez hornitu behar dira, informazioa modu eraginkorragoan kudeatzeko.

Nori zuzendua: Komunikazio-ardurak dituzten informazio-kudeatzaileei, programa-garatzaileei, marketin-arduradunei eta, orokorrean, Internet begien aurrean duen enpresa, sozietate edo talde orori.

Helburu orokorrak: Tresna asko dira sindikatzeko aukera eskaintzen digutenak; horregatik, helburua da informazio-iturri horiek guztiak jasotzea, aukeratzea, era egokian definitzea, iragaztea, kudeatzea eta erabiltzen ikastea.

Helburu operatiboak:
- Edukiak sindikatzea zer den ikastea.
- Edukiak sindikatzeko aukera eskaintzen duten zerbitzuak ezagutzea.
- Feed-ak (edo kanalak) irakurtzeko tresna kontrolatzea.
- Zerbitzu horien guztien informazioa kudeatzen, iragazten eta sailkatzen ikastea, Yahoo pipes bezalako erremintekin.
- Edukiak sindikatzeak barne-komunikaziorako eskain ditzakeen aukerak ezagutzea.
- Edukiak sindikatzeak izan ditzakeen erabilera zehatzak ezagutzea eta zein esparrutan baliagarri izan daitezkeen jakitea.

Tokia: Miramoneko Teknologiko Elkartegia. Mikeletegi pasealekua 56 1. 20009 Donostia

Egitaraua:

1. MODULUA
· Zer da edukiak sindikatzea?
· Sindikatzeak eskaintzen dituen aukerak.
· Feed mota ezberdinak eta nola erabiltzen diren.
· Feed formatu eta mota ezberdinak.
· Informazioaren kudeaketa egokia egiteko hainbat erabilera.
· Hainbat bilatzaileren bidezko alertak.
· Talde-lanerako hainbat tresnaren integrazioa.

2. MODULUA
· Informazioaren kudeaketa egokia egiteko hainbat erabilera (jarraipena).
· Gure informazioa hainbat lekutan nola erakutsi.
· Buletin elektronikoak sortzea.
· Atari tematikoak sortzea.
· Informazioa erakunde barnean trukatzea.
· Hainbat informazio-iturri iragaztea, nahasketa eta berrerabilpena, Yahoo pipes erabilita.

3. MODULUA
· Informazioaren kudeaketa egokia egiteko hainbat erabilera (jarraipena).
· Hainbat informazio-iturri iragaztea, nahasketa eta berrerabilpena, Yahoo pipes erabilita (jarraipena).
· RSSren eta hainbat formaturen arteko bihurketa.
· Podcast eta Vidcast.
· Inportazioa eta esportazioa OPML formatua erabiliz.
· Edukiak sindikatzearen etorkizuna.

Bestea:

Metodologia:
Erabiliko den metodologian, teoria eta praktika tartekatu egingo dira.
1. Modulu bakoitzaren hasieran, jorratu beharreko gaien laburpena egingo da.
2. Jorratu beharreko gaiaren azalpena egingo da.
3. Behar den unean, dagokion praktika egingo da.
4. Amaitzeko, debatea eta zalantzak argitzea.

Ikastaroa euskaraz izango da.

Openstreetmaps eta Wikiak

teketen — Wed, 21 May 2008 07:20:00 +0000

Aurten ere UEUk eskaintza zabal bat prestatu du. Horien artean informatikaren inguruko ikastaroak ere aurkitzeko izango dituzue baina menu osoa hau da.

Wikiak eta elkarlanerako tresnak

Wiki bat (hawaiieratik wiki wiki, "azkar-azkar") web gune mota bat da non erabiltzaileek orrialdeak sortu, editatu, ezabatu eta eraldatzen dituzten. Wikiak idazkera elkarreragilea bultzatzeko modu egokienak dira.

Dokumentuetan pertsona talde deszentralizatu batek parte har dezake eta dokumentuen bertsio guztiak gordetzen direnez, informazio-kudeaketa egiteko tresna egokia izan daiteke, kudeaketa, egutegiak, dokumentuak, bilerak, aktak etab. sortzeko.

Enpresa, elkarte edo taldeetan kudeaketa parte-hartzaileagoa, deszentralizatua edota taldekakoa egitea garrantzitsua da. Horregatik beharrezkoa da wikiak ezagutzea, kudeaketa era berri eta egokiago bat egin nahi badugu. (informazio gehiago)

OpenStreetMap: mapa libreen sorkuntza erabiltzaileon eskura

Teknologiak eta merkatuak bultzatuta, informazio geografikoaren eremua izugarrizko indarra hartzen ari da azkenaldian. Autoetako gidariei laguntzeko tresnak, mendiko ibilbideak gidatzekoak, geografikoki kokatutako zerbitzuak, logistika industrialeko aplikazioak edo tokian tokiko publizitatea dira jadanik martxan dauden edo denbora gutxian ikusiko ditugun aplikazio batzuk.
Baina informazio geografikoan parte hartzen duten elementuetatik datuak (mapak, kaletegiak, zerbitzuen kokapenak, orografia eta abar) izango dira hurrengo urteotako giltzarria. Izan ere, teknologia eta aplikazioak nahikoa garaturik daude, eta datuak dira normalean arreta gutxien jasotzen dutenak.
Ikastaro honetan datu geografikoen sorkuntza erabiltzaileen esku jarri nahi da, OpenStreetMap proiektuaz baliatuz eta aldi berean aberastuz. OpenStreetMap-en helburua, erabiltzaile arrunten laguntzaz Wikipediaren estilora munduko maparik onena lortzea da. (informazio gehiago)